عشان أنت مصري
شعر: أحمد فؤاد نجم
عشان أنت مصري لازم تعانى
وتفقد كرامتك بكل المعاني
وتحرق فى دمك سنين مش ثواني
وأوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى
عشان أنت مصرى العذاب بيناديك
بتبدأ فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى أيديك
وجسمك ملزق وريحتك عاديك
فتلبس وتنزل وفيك اللى فيك
ورايح لشغلك حتحتاج مواصله
أدى المترو واقف وكهربته فاصله
وفى الميكروباص خناقه وحاصله
أوتوبيس فرامله عايزالها وصله
وتوك توك ده تايه ومحتاج لبوصله
بتوصل لشغلك بدم أتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف أتسرق
وفى كام مواطن عاملك قلق
بيشكى تقول له روح أندعق
وعركه وهوجه وشاى أندلق
ومخك خلاص من الصداع أتفلق
هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص أستويت
عيالك بتطلب وهات كيت وكيت
تزعق تهاتى ياناس أتهريت
ولاحد سامعك مهما هاتيت
عشان أنت مصرى وده للأسف
فلازم تآسى تعيش تتقرف
وكل الأساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
المشاركات
