اســتـــراحــة الـمحــارب

تاج الجزيرة ... المرة دى سلطانيتين  

أى كلام والسلام Add comments

مش عارف التيجان عمالة تتحدف على من كل حتة ..

الاسبوع ده تاجين

واحد من رفقة عمر و التانى من مها

نبدأ بالاول من رفقة عمر

السؤال الاول هل كنت طالب شاطر فى المدرسه

للاسف ايوه و بصورة متعب. كنت على طول شاطر .. ومن اوائل المحافظة ... فى الابتدائية . وصورتى طلعت فى الجرايد و اتنشرت على سلاح التلميذ .. . كانت ايام

وفى اعدادى و ثانوى نفس القصة ..... يمكن لما دخلت كلية .. معدل المذاكرة قل .. لانها دنيا جديدة .. و فكر مختلف و سياسة..

ايه اكتر مادة حبيتها واكتر مادة كرهتها فى المدرسه وفى الجامعه
انا محايد فى المذاكرة .. مفيش حلو و وحش .. وان كنت باحب الرياضيات فى المدرسة .. و باكره الجغرافيا مع انى كنت باجيب الدرجات النهائية فيها اما فى الكلية .. كنت باحب الرمد و لو مكنتش اتخصصت طب حرج كنت اتخصصت رمد .. و كنت باكره الكمياء الحيوية ..

السؤال الثانى كنت عايز تطلع وانت صغير

واضح طبعا .. دكتور .. .. اصل الوالد الله يرحمه كان دكتور . و ربنا أكرمنى انا و اخى و بقينا اطباء .. بس اخويا جراح .. و اختى برضه طبيبة .. بس بيطرى ..
بس بجد كان نفسى اطلع طيار ... اومخترع .. لاى حاجة بس اخترع


نيجى بقى للتاج و السلطانية التانية
من مها
....


تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارستها
القراءة و حطوا جنبها مليون نقطة .. انا عندى استعداد اقرأ اى حاجة .. ورق طعمية .. اكياس لب ... بالنسبة لى كل ورقة مهمة اعرف فيها ايه .. لانها مصدر معلومات
و كنت عندى استعداد اقرا اى حاجة و انا واقف ... يعنى لو فى كتبة .. ممكن أفر كتاب .. و اقرا منه صفحات بسرعة .. و دى نعمة القراءة السريعة .. (على فكرة دى ممكن الواحد يتدرب عليها ) و بتنفعنى فى الحياة..
أمرر السلاطين دى.. لمين .. ؟؟؟
طيب .. أولا علا .. او غفران
و محمد عبد الغفار
الدكتورة الشيماء... المختفية
و كل الصف الباقى اللى فى مدونات صديقة
و ثانيا .. نستضيف ناس مش بيدخلوا عندى كتير .. خليهم ييجوا بالعافية ..
اسلامى
و احمد شقير

..

2 تعليقات

1. khaled  
   السبت, أبريل 07, 2007

   حاسب لان التيجان ليها ودان

2. Maha  
   الأحد, أبريل 08, 2007

   سبحان الله .. مفس الإجابة عن التاج الثاني أتت من جموع المدونين اللى وصلهم الوسم "التاج" ده
   
   القرآءة :)
   
   وبصراحة هي مش غريبة :)

إرسال تعليق